Ramush Haradinaj thotë se merr mbështetje nga familja e presidentit Rugova

Ramush Haradinaj thotë se merr mbështetje nga familja e presidentit Rugova

Plagoset një 15 vjeçar në Prishtinë, mësohet autori
Mogherini në Prishtinë, takime me pushtetin dhe opozitën

Kandidati i koalicionit PDK-AAK-NISMA për Kryeministër, Ramush Haradinaj, pasi ka dalë nga rezidenca e Presidentit të ndjerë Ibrahim Rugova, në Velani, ka thënë se vizita ka qenë familjare.

“Ishte takim vërtetë më së pari familjar me familjen e presidentit historik Rugova”, ka deklaruar Haradinaj.

Ndërsa, në një komunikatë për media të lëshuar nga AAK-ja, thuhet se Haradinaj ka marrë mbështetje për misionin e ndërtimit të shtetit dhe institucioneve të Republikës së Kosovës nga Familja e Presidentit historik Ibrahim Rugova

“Eshtë nder i veçantë për mua që sot isha mysafir në Familjen e nderuar të Presidentit historik Ibrahim Rugova dhe njësoj si në vitin 2004 kur ishte nevoja e bashkimit të forcave për unitet politik, përballë sfidave të kohës”, thuhet në kumtesë.

Presidenti Rugova pa hezitim theu paragjykimet për të kapërcyer ndasitë artificiale të atëhershme dhe për t’i dhënë fund armiqësive absurde mes shqiptarëve dhe me dha mbështetjen për Kryeministër të Republikës së Kosovës, edhe sot u ndjeva njëjtë kur mora mbështetje për misionin tonë të përbashkët të ndërtimit të shtetit dhe institucioneve të Republikës së Kosovës nga Familja e Presidentit historik Ibrahim Rugova, thuhet nder të tjera në komunikat të AAK-së.

Historia e re e Kosovës është histori e afrimit dhe besimit në mes njerëzve, rezultat i luftës, sakrificës, mirëkuptimit dhe tolerancës. Këtë strategji kombëtare e ndiqte presidenti dr. Ibrahim Rugova, për te bërë shtetin dhe qeverinë e Kosovës. Tani e kemi shtetin tonë te pavarur të Kosovës, por këtë shtet duhet zhvilluar, ndërtuar dhe integruar në të gjitha mekanizmat ndërkombëtar. Ky edhe ishte përkushtimi dhe amaneti i Presidentit historik Dr. Ibrahim Rugova, me të cilin bëmë koalicion qeverisës në Nëntor të vitit 2004, duke besuar thellësisht në vlerat kombëtare, patriotike dhe integruese. Bashkëpunimi me familjen Rugova u vazhdua edhe më vonë, kur Ukë Rugova kandidoi i renditur në vendin e dytë në listën e përbashkët AAK-Lista Ibrahim Rugova. Bashkëpunimi me këtë familje të nderuar nuk është ndalur për asnjë moment, andaj sot në frymën e afrimit dhe filozofisë së Presidentit historik Dr. Ibrahim Rugova, ne po e konfirmojmë mbështetjen, bashkëpunimin e përhershëm dhe respektin e ndërsjellët. Unë si i nominuar për kryeministër të Republikës se Kosovës, me kënaqësi e pranoj mbështetjen e familjes emblematike të Presidentit Rugova dhe zotohem që do të bëj ç ‘mos për ruajtjen e vlerave dhe mësimeve të Presidentit Rugova, për ruajtjen e miqësisë të përhershme me SHBA-të, BE dhe NATO. Objektivat e përhershme për një Kosovë të zhvilluar ekonomikisht, të integruar në familjen evropiane, për lëvizje të lirë të qytetarëve të saj, për sundimin e ligjit dhe rendit, do të jenë prioritete në agjendën e qeverisjes sime!

Gjithashtu, do të kemi respekt dhe kujdes të veçantë për familjet emblematike dhe legjendare, siç është familja e Presidentit historik Dr. Ibrahim Rugova, familja Jashari si dhe familjet e tjera që sakrifikuan dhe u flijuan për lirinë e Kosovës.

Shfrytëzoj rastin që nga kjo shtëpi, t’i bëj ftesë të gjithë atyre që përqafojnë idetë e Presidentit Rugova, e në veçanti kreut të LDK-së Isa Mustafa dhe presidentit të AKR-së z. Behgjet Pacolli, që të mbështesin formimin sa më të shpejt të qeverisë së vendit dhe bashkimin e forcave shtet-formuese, për të përshpejtuar agjendën e forcimit të Republikës se Kosovës dhe integrimin e saj në strukturat euro-atlantike.

Zoti e bekoftë përjetësisht jetën dhe veprën e Presidentit historik Dr. Ibrahim RUGOVA!

Zoti e bekoftë Kosovën dhe popullin e saj!

Ndryshe, mediat të cilat edhe kanë nxjerrë pamje para se të nis takimi në Velani, kanë raportuar se tashmë Ramush Haradianaj ka arritur marrëveshje që Teuta Rugova t’a votojë mandatarin e PAN-it për Kryeministër, në seancën e parë konstruktive të Kuvendit të Kosovës, që pritet të ndodhë javën e ardhshme.

COMMENTS