Prishtinë, Dhjetëra persona të lënduar si pasojë e motit të ligë

Qendra Emergjente në Qendrën Klinike Universitare të Kosovës, në 24 orët e fundit ka pranuar disa raste me lëndime të marra si pasojë e aksidenteve të ndryshme, të shkaktuara kryesisht nga kushtet atmosferike që po mbizotërojnë në vendin tonë.

Skender Fetahu, specializant i mjekësisë emergjente në QKUK, tha për KosovaPress se brenda 24 orëve në Qendrën Emergjente është kërkuar ndihmë në 65 raste, ku 15 prej tyre kanë qenë si pasojë e aksidenteve në trafik, 35 për shkak të lëndimeve ortopedike dhe 15 të tjerë si pasojë e lëndimeve të vogla nga rrëzimet dhe rrëshqitjet.

‘Brenda 24 orëve në Qendrën Emergjente kanë kërkuar ndihmë mbi 15 raste prej aksidenteve në trafik në dhomën e reanimacionit, 35 raste në dhomën e ortopedisë për shkak të lëndimeve dhe 15 raste i kemi trajtuar në dhomën e vogël për shkak të lëndimeve në sallën e vogël me ndërhyrje të vogla kirurgjike. 90 % kanë qenë pasojë e bërës, ndërsa 10% prej traumave të ndryshme brenda familjes ose objekteve ku punojnë. Në dhomën e ortopedisë kanë qenë më shumë për shkak të rrëzimeve dhe rrëshqitjeve nëpër ambiente’, tha Fetahu.

Bora e cila për gati dy ditë ra vazhdimisht përcjellur me temperaturat shumë të ulëta, kishte vështirësuar qarkullimin në të gjithë vendin, ku për pasojë pati edhe aksidente dhe të lënduar lehtë.

COMMENTS