Mes Kosovës e Shqipërisë diskutohet problemi i çmimeve referente

Ministrja në detyrë e Tregtisë dhe Industrisë, Hykmete Bajrami, dhe zëvendësministri i Financave, po ashtu në detyrë, Agim Krasniqi, kanë pritur sot n

Ministrja në detyrë e Tregtisë dhe Industrisë, Hykmete Bajrami, dhe zëvendësministri i Financave, po ashtu në detyrë, Agim Krasniqi, kanë pritur sot në vizitë zyrtare zëvendësministren e Financave të Republikës së Shqipërisë, Irena Beqirja, me të cilën kanë diskutuar çështjen e çmimeve referente që po vendosen nga Tirana, si dhe për çështje të tjera që janë pjesë e marrëveshjeve që janë nënshkruar deri më tani midis Kosovës e Shqipërisë.

Beqirja ka thënë se kanë rënë dakord që dy organizata të tatimeve dhe doganave në çdo vendimmarrje dhe çdo proces që lidhet me tragetin midis dy vendeve të dakordohen paraprakisht. Sipas saj, ka vullnet politik nga të dyja palët dhe se është zotuar që tregtia me Kosovën është një nga prioritetet e Qeverisë së Shqipërisë. Ajo ka sqaruar për vendosjen e çmimeve referencës për produktet nga Kosova.

‘Zakonisht çmimet e referencës vendosen nëpër administrata të doganore si një metodë e gjashtë në vlerësim. Pra kur një tregtar vjen në doganë përdorë transaksionin, nëse i ka të gjitha dokumentet në rregull, faturat, certifikatën e origjinës, nëse nga ana e doganës dyshohet që një pjesë e mirë e dokumenteve nuk janë të rregullta përdoret çmimi i referencës, sepse është si metodë vlerësimi. Kuptohet është e gjashta që përdoret dhe gjithë doganat shqiptare por edhe me Kosovën të paktën 85 për qind e të gjitha vlerësimeve bëhet në bazë të transaksioneve. Vetëm kur ka ndonjë anomali mund të përdoret çmimi i referencës. Ne kemi çmime të referencës jo vetëm me Kosovën, por edhe me vendet tjera. Nuk është një gjë që ka ndodhur vetëm me Kosovës dhe ka ndodhur vetëm me patate. Zakonisht Ministria e Financave herë pas herë miraton disa çmime referente për disa produkte që dogana duhet t’i zbatojë në rastet kur produkti që vjen me dokumentacionin të jetë i plotë’, tha Beqirja.

Ajo ka pranuar se për vendosjen e çmimeve referente nuk është njoftuar ministrja e Kosovës, por, sipas saj, në nivel teknik doganat me njëra-tjetrën kanë pasur shkëmbim informacioni ditor.

Hykmete Bajrami, ministrja në detyrë e Tregtisë dhe Industrisë, ka thënë se Kosova, si anëtare e CEFTA-së, ka probleme dhe barriera tregtare me vendet fqinje. Ajo u ka bërë thirrje fermerëve kosovarë që t’i eksportojnë patatet në Shqipëri, sepse nuk do të ketë më barriere.

‘Është e vërtet, Kosova si anëtare e CEFTA-së ka probleme dhe barriera tregtare me disa vende, sidomos me vendet fqinje. Një numër të barrierave i kemi edhe me Shqipërinë. Ajo çfarë është përparësi, me autoritetet e Shqipërisë kemi bashkëpunim shumë më të ngushtë, qasje të nivelit më të larta institucionale atje dhe ka një vullnet politikë për t’i zgjidhur këto probleme. Ne sot biseduam për çmimet referente të patates. Zëvendësministrja , ashtu edhe ministrja Ikonomi, janë zotuar më herët që kjo është një nga metodat e mundshme për t’u implementuar, mirëpo nuk do të implementohet, do të përdoren çmimet e transaksioneve të dy drejtorët e doganave, institucioneve respektove, të cilët sot ishin prezentë, do të ulen dhe brenda një jave do të dakordohen për eliminimin e çmimeve referente të të gjitha produkteve. Siç e dini ne kemi një sërë marrëveshje dhe memorandumesh bashkëpunimi mes institucioneve tona dhe marrëveshje në drejtimin e tregtisë kemi grupe teknike, të cilat punojnë shumë mirë. Dua të shfrytëzoj rastin që t’iu bëj thirrje fermerëve kosovarë që ata pa asnjë lloj hezitimi të ekspertojnë patatet e tyre në Shqipëri, sepse nuk do të ketë barriera nga autoritetet doganore të Shqipërisë’, tha Bajrami.

Ndërsa, zëvendësministri në detyrë i Financave, Agim Krasniqi, tha se janë diskutuar hapat dhe masat që dalin nga marrëveshjet që janë arritura me marrëveshjet mes dy vendeve.

‘Në këtë kuptim i diskutuam të gjitha hapat dhe masat që rrjedhin prej këtyre marrëveshjeve . Edhe diskutuam bashkërisht për problemet e fundit, çmimet referente për të cilat ministrja e Tregtisë do të flasë më shumë. pra qëllimi i takimit ishte me vazhdua bashkëpunimin në mënyrë që tregjet tona me qenë më të hapura , më të afërta edhe bizneset tona me pas më lehtë shkëmbimin tregtarë’, tha Krasniqi.

Në këtë takim pjesëmarrës ishin ambasadori i Shqipërisë në Kosovë, Qemajl Minxhozi, drejtoresha e Përgjithshme e Doganave të Republikës së Shqipërisë, Belinda Ikonomi, drejtori i përgjithshëm i Doganës së Kosovës, Bahri Berisha, drejtori i Administratës Tatimore të Kosovës, Sakip Imeri, si dhe drejtori i Departamentit t Politikave Ekonomike, Publike dhe Bashkëpunim Ndërkombëtar Financiar, Behxhet Haliti.

COMMENTS